Wararka ka imaanaayo magaalada
muqdisho ayaa sheegaayo in Madaxweynayaashii hore ee Soomaaliya Sheekh Shariif
Sheekh Axmed iyo Xasan Sheekh Maxamuud ay Ra’iisul Wasaare Maxamed Xuseen
Rooble u gudbiyeen cabasho ay ka qabaan sida ay baarista u sameeyeen guddigii
heerka wasiir ee loo saaray kala saarista xubnaha guddiga doorashooyinka ee
cabashada laga qabo.
Hannaanka loo maray turxaanbixinta xubnaha guddiyada doorashooyinka ee heer
federaal iyo dowlad goboleed kama duwana habkii loo magacaabay. Xukuumadda
iyadaa guddiyada soo magacaawday, iyadaa go’aansatay iney faafiso magacyada
xubnaha tabashada laga qabo, caddeymaha iyada uunbaa heshay ama soo waysay.
Ma jirto talo laga geliyey cidii cabashada qabtay, liiskana gudbisay oo ay
ugu horreeyaan Midowga Murashaxiinta. Mana cadda hannaanka loo maray turxaan
bixinta xubnaha.
Waxaan aaminsanahay in inta badan xubnihii NISA ka tirsanaa, gaar ahaan
kuwii dharcadda ahaa (Undercover) ay weli si xoog leh guddiyada ugu jiraan.
Waxaan ka codsanaynaa Raysalwasaaraha in uu xallinta tabashooyinka u maro waddo
sax ah oo daahfuran, hufnaan iyo dhexdhexaadnimo leh, si ay doorashadu u noqoto
mid la isla ogolyahay.
Shaacinta liiska ayaa loo arkaa qorshe looga hortagayo in gadaal laga
faro-geliyo liiska, ayada oo la tuhmayo inay ka dambeyso Villa Somalia, si
mucaaradka looga dhigo kuwa cabasho joogto ah wada.
Turxaan bixinta tabashada Guddiga doorashooyinka waa in ay martaa habraac
hufan, daahfuran, dhexdhexaad ah si loo gaaro natiijo doorasho oo lagu wada
qanacsan yahay. Hadafkeenu afartii sanno ee tagtay wuxuu ahaa in aan dalka
majarihiisa iyo hannaankiisa dimuqoraadiyad la weecin. Wixii aan Farmaajo ka
diidnay, Rooble ka yeeli mayno.
Siyaasaddu waa maareynta maan, maslaxad iyo muruq is diiddan oo lagu
mideeyo hadaf iyo hiigsi qaran. Waa aragti cad, mabda' sugan iyo mowqif aan
isbeddelin. Waa talo wadaag, tanaasul iyo tabarguur. Waxay u baahan tahay
tagtadii oo laga talo qaato, taaganta oo tognaan lagula falgalo iyo timaaddada
oo loo toog hayo.
0 Comments