Weeraryahanka heerka caalami ee dalka Senegal Sadio Mane ayaa ka tagay xerada
kooxdiisa cusub ee Bayern Munich ee dalka Mareykanka, isagoo ku sii jeeda dalka
Morocco oo uu safar dhib badan ku jiro, si uu uga qeyb galo bandhig faneedka
xiriirka kubadda cagta Afrika (C) ee ka dhacaya Rabat.
Mane ayaa markii labaad ku dhawaaday inuu ku guulaysto abaal marinta xidiga
sanadka ee qaarada Afrika, intii ay socotay xaflada uu soo agaasimay Rabat
fiidnimadii Khamiista, ka dib markii uu xulka Senegal ku hogaamiyay hanashada
koobka qaramada Afrika markii ugu horaysay bishii February ee ina dhaaftay.
Ciyaaryahanka reer Masar ee Mohamed Salah, xiddiga Liverpool iyo saaxiibkii
hore ee Mane, iyo sidoo kale goolhayaha reer Senegal ee Edward Mendy,
ciyaaryahanka Chelsea, ayaa ku tartamaya abaalmarinta.
Mane ayaa ku guuleystay abaal-marintii ugu dambeysay ee laacibka sanadka ee
Afrika 2019-ka.
“Dabcan Sadio waxa uu u qalmaa abaal marinta laacibka sanadka ee Afrika
markii labaad” ayuu yiri madaxa Bayern Oliver Kahn.
Mane waxa uu ku safray 25,000 kilomitir siddeed maalmood gudahood, isagoo
ka soo safray Munich kuna sii jeeday Washington Isniintii la soo dhaafay, ka
dibna u sii jeeday Rabat ka dibna ku laabtay Mareykanka, halkaas oo Bayern ay
kula kulantay Manchester City, oo ah horyaalka England, Axadda, ka hor inta
uusan ku laaban Munich Maalinta xigta.
0 Comments