Taliye Odawaa oo ka hadlay howlgal lagu laayey xubno ka tirsanaa Al-SHABAB.

Taliyaha ciidamada Xoogga dalka Somaliyeed, Odowaa Yuusuf Raage ayaa faahfaahin ka bixiyey howlgal qorsheysan oo ay ciidamada Xoogga dalka ka fuliyeen duleedka deegaanka Janaale oo ka tirsan gobolka Shabeelaha Hooose ee Somalia.

General Odowaa oo la hadlay warbaahinta ayaa shaaca ka qaaday in howlgalka oo ka dhacay tuulada Kili-Jiido oo hoostagta Janaale lagu beegsaday kooxda Al-Shabaab.

Taliyaha ayaa xaqiijiyey in howlgalkaasi lagu dilay ugu yaraan illaa 10 ka tirsanaa Al-Shabaab, isla-markaana ay dhaawaceen 13 kale.

Sidoo kale wuxuu intaasi ku daray inay kooxda Al-Shabaab ka soo furteen hub fara badan, ayna burburiyeen fariisimo ay ku lahaayeen halkaasi.

Waxa kale oo uu tilmaamay in ay sii wadi doonaan dhaq-dhaqaaqyada ka dhanka ah Al-Shabaab ee ka socda gobolka Shabeelaha Hoose ee Koonfur Galbeed Somaliya.

Dhanka kale ma jiro wax hadal ah oo ka soo baxay dhinaca Al-Shabaab oo ku aadan howlgalkaasi ee ay guulaha ka sheegteen ciidamada Xoogga dalka Soomaaliyeed.

Xaaladda ayaa haatan kacsan, waxaana duleedka Janaale laga dareemayaa dhaq-dhaqaaqyo ciidanka oo iska soo horjeedo, sida ay innoo sheegeen ilo deegaanka ah.

Gobolka Shabeelaha Hoose ayaa ka mid ah meelaha ay ku xoogan tahay kooxda Al-Shabaab, waxaana inta badan ka dhaca dagaallo geysta khasaare kala duwan.